Presthólar

Þetta var opin ófrágengin náma og hafði efnið að mestu verið tekið úr gervigíg í Presthólahrauninu sem var uppurinn. Nýtt námusvæði var skilgreint við jaðar gígsins sem nú er horfinn. Um 8 þús. m² svæði hafði þegar verið raskað þegar ráðist var í fyrrnefndar framkvæmdir á Norðausturvegi.

Efnistakan var fyrirhuguð í gjall og hrauneitla og var ákvæði í útboðsgögnum um að hvorki væri hreyft við gervigígum né óröskuðu hrauni. Við frágang námunnar var miðað við u.þ.b. 35.000 m³ efnistöku á 11.500 m² svæði svo meðalstálhæð yrði rúmlega 3 m. Mörk námunnar voru dregin þannig að hún félli sem best að aðliggjandi lægðum í landinu.

Við frágang voru jaðrar námunnar mótaðir með halla og formum sem eru í óröskuðu hrauni utan námunnar. Lögð var áhersla á að halda eftir eitlum sem eftir voru í námunni til að brjóta fláa betur upp. Sáð var í námuna að frágangi loknum. Við efnistökuna hafði verið skilinn eftir allstór hraunhóll við jaðar námunnar rétt við Norðausturveg. Því er náman vart sýnileg frá veginum. Þetta verklag mætti viðhafa víðar, þ.e. að skilja eftir stakar jarðmyndanir á námusvæðum, þar sem slíkt getur í mörgum tilfellum auðveldað aðlögun námusvæðisins að landformum innan og utan námunnar.

Ljósmyndir tóku Gunnar Bjarnason (GBj), Gunnar H. Jóhannesson (GHJ) og Rúnar Jónsson (RJó), starfsmenn Vegagerðarinnar.